Владимир Путин Сергей Ивановны президент администрациясе башлыгы вазыйфасыннан алды. Аның урынына Ивановның урынбасары Антон Вайно билгеләнде, диелә Кремль белдерүендә.
Сергей Ивановка исә Русия президентының табигатьне саклау, экология, транспорт мәсьәләләре буенча махсус вәкиле вазыйфасы бирелде.
Путин әйтүенчә, Иванов башка эшкә күчерелүен үзе сораган һәм аның урынына Антон Вайноны куярга киңәш иткән. Илбашы президент администрациясе башлыгы вазыйфасында эшләгәндә Ивановтан канәгать булуын белдерде.