"Мин башта бөтен кеше белән башкортча исәнләшәм, җавап бирсәләр, башкортча сөйләшә башлыйбыз"
Башкорт дәүләт педагогик университеты студенты Байрас Азаматов корылтайда беренче тапкыр катнаша. Ул үзе Баймау районыннан, башкорт теле укытучысы белгечлегенә укый. Башкорт яшьләрен борчымаган мәсьәләләр юк, барлык өлкәләрдә эшләргә кирәк, дип ул.
"Телне укыту белән генә саклап булмый, ул интернет өлкәсендә дә, чараларда да кулланырга тиеш. Без башкорт телендә кушымталар ясыйбыз, интернетта башкортча медиа контент булдырабыз. Телне үстерү укыту белән генә чикләнми, укыту да мөһим булса да", дип сөйләде ул Азатлыкка.
Азаматов сүзләренчә, яшьләр арасында башкортча сөйләшүчеләр күп. "Мин Уфада 4 ел укыйм, монда да башкортча сөйләшүчеләр күп, башкорт яшьләре күп кызыклы чаралар оештыралар. Мин башта бөтен кеше белән башкортча исәнләшәм, җавап бирсәләр, башкортча сөйләшә башлыйбыз", ди ул. Ул башка студентлар белән башкорт теле курсларын да оештыра, анда урыслар да күп килә, ди Байрас.
Башкорт корылтаена "Башкорт" оешмасы җитәкчесе Фаил Алчынов та килде. Ул Зилаер районыннан делегат итеп сайланса да, аны исемлектән сызып ташлаганнар иде.
Алчынов барлык делегатлар кебек теркәлү урынында бейдж алды, залга кергәч, аның янына полиция килде, "Сез кем, нигә үттегез?" дип беджын тартып алды. Әлегә Алчыновны куып чыгармадылар, ул "мин тулы хокуклы делегат" дип, корылтайда катнашырга ниятен белдерде.
Полиция тавыш куптарырга теләми булса кирәк, әлеге вакытта бөтен халык залда, Башкортстан башлыгы вазифаларын үтәүче Радий Хабировны көтәләр.
Башкортстан башлыгы идарәсеннән Азат Бадранов исемле кеше кеше Фаил Алчыновны алып китте, аны бинаның хезмәт бүлмәсенә кертеп яптылар, аннан чыгармыйлар.
Башкорт корылтае башкарма комитеты әгъзасы Рамиль Рәхмәтов әйтүенчә, Алчыновны куәт хезмәткәрләре утырган бүлмәгән керткәннәр. "Аны шул бүлмәдән чыгмаячаклар, аның белән сөйләшү алып барыла", дип белдерде ул Азатлыкка.
Корылтай башлана, "Урал" халык көе яңгырый. Русия, Башкортстан гимннары соңрак яңгыраячак.
Корылтай пленар утырышы башланды. Галим, филология фәннәре докторы Рәшит Шәкүров беренче булып сөйли. Ул Башкортстан башлыгы Радий Хәбировка "җыен рәхмәтен" белдерде, корылтайны ачык дип игълан итте.
Корылтайны Башкортстан башлыгының иҗтимагый-сәяси үсеш буенча идарәсе башлыгы Урал Килсенбаев алып бара.
Президиумда Урал Килсенбаев, Данир Гайнуллин, Эльвира Аиткулова, Зөһрә Рахматуллина, Азамат Колмөхәммәтов, Рәшит Шакуров утыра.
Корылтай регламенты кабул ителде, тавыш бирелде, эш телләре булып башкорт һәм урыс телләре аталды.
Халыклар ассамблеясе исеменнән Зөһрә Рахматуллина чыгыш ясый. Ул халыклар дуслыгы, башкорт халкының башка халыкларга дустанә мөнәсәбәте турында сөйли. "Үз телебезне үстерү генә түгел, бу эштә башка халыкларга да теләктәшлек белдерү турында гел уйлыйбыз", ди ул. Рахматуллина экстремистлар, милләтчеләр куркынычы булуын әйтә.