АКШның Вәкилләр пулаты Русия белән бәйле активларны Украинага ярдәм итү өчен куллану мөмкинлеге бирүче канун өлгесен хуплы. Сүз 2 млн сумнан зуррак активлар турында бара. Шул исәптән Русия энергия ширкәтләрен милке дә кулланылачак. Моннан тыш Русия хакимиятләре белән хезмәттәшлек ярдәмендә алынган активлар да кулланылачак.
Украина Русия һөҗүмнәренең артуын белдерде
Русия Украинада һөҗүм темпларын арттыра. Украина саклану министрлыгы вәкиле Александр Мотузяник сүзләренчә, Русия гаскәрләре барлык юнәлешләрдә дә диярлек интенсив атышлар алып бара. Аеруча Харьков һәм Донецки өлкәләрендә актив хәрби һөҗүмнәр бара. Министрлык мәгълүматынча, Русия гаскәрләренең төп максаты – фетнәчел Донецки һәм Луһански өлкәләрендә тулысынча контроль урнаштыру һәм аннексияләнгән Кырым ярымутравына җирдән коридор ачу.
Русия гаскәрләре Азов диңгезе яр буен контрольгә алды, әмма чынлыкта коридор әлегә юк, чөнки булган юллар Мариуполь аша уза, ә бу шәһәрнең бер өлеше элеккегечә украин гаскәрләре контролендә.
Тулырак монда укый аласыз.
"КАМАЗ" Мьянмада машиналар җитештерә башлау мөмкинлеген өйрәнә
2022 елның маенда "КАМАЗ" ширкәте Мьянманың җитештерү мөмкинлекләрен өйрәнү өчен бу илгә үз белгечләрен җибәрергә ниятли. Татарстан президенты Рөстәм Миңнеханов хәзер Мьянмада эш сәфәрендә. "КАМАЗ" машиналар җитештерү, хезмәткәрләрне укыту, сервис челтәрен үстерү мөмкинлекләрен карый. Тәкъдимне июньгә кадәр оештырып бетерергә һәм имзалауга тәкъдим итәргә ниятлиләр.
Тулырак монда укый аласыз.
Германия парламенты Украинага авыр кораллар бирүне хуплады
Германия парламенты Бундестаг Украинага авыр хәрби техника җибәрүне хуплап тавыш бирде. Депутатлар Украинага хәрби ярдәмне мөмкин булган барлык юллар белән дәвам итәргә кирәк дип карар итте. Бу турыда хәбәр иткән DW моны “тарихи” карар дип атый. Германия, хәрби низаглар барган төбәкләргә корал җибәрү сугышны көчәйтә генә дип, элек мондый адымнардан гел тыелып килә иде. Бу юлы исә корал җибәрүгә бары “Сул фирка” һәм бу адым “сугыш игълан итүгә якын” дип белдергән популист “Германия өчен альтернатив” фиркасе депутатлары гына каршы тавыш бирде.
Тулырак монда укый аласыз.
Сугыш башлангач Русиянең Европага энергия чыганаклары сатудан керемнәре ике тапкыр арткан
Украинага каршы сугыш башлаганнан соң, Русия Европа берлеге илләренә энергия чыганаклары сатудан керемнәрен ике тапкырга диярлек арттырган. Сату күләме кимесә дә, эмбарго кертү турындагы сөйләшүләр вазгыятендә энергия чыганакларына бәяләрнең артуы экспорттан Мәскәүгә 63ләп млрд евро китергән. Шул акчаның 71 проценты (44 млрд евро) Европа берлегеннән килгән. Бу 2021 елның шул ук чоры белән чагыштырганда ике мәртәбә күбрәк.
Тулырак монда укый аласыз.
Татарстанда дача сатып алырга теләүчеләр 30 процентка арткан
Татарстанда дача сатып алырга теләүчеләр күбәйгән. 2022 елның беренче чирегендә андыйларның саны 33 процентка, узган бер елда 30 процентка арткан. Шул ук вакытта дача сату турындагы игъланнар быел беренче чиректә 18 процентка, бер ел эчендә 11 процентка кимегән. Бәяләренә килгәндә, чирек ел һәм бер ел эчендә аларга бәя үзгәрмәгән.
Тулырак монда укый аласыз.
Канада Русия гамәлләрен украин халкы геноциды дип таныды
Канада Вәкилләр пулаты Русия гамәлләрен украин халкы геноциды дип бертавыштан таныды. Резолюциядә әйтелгәнчә, сугыш барышында Русия "киңкүләм ерткычлыклар" кылган һәм "Украинаның тыныч халкын махсус системлы рәвештә үтергән”. Документ авторы Хизер Макферсон белдерүенчә, Русия гамәлләрен геноцид дип тану – беренче адым. Ул хөкүмәтне Русиягә каршы чикләүләрне кырыслатырга һәм Украинага һуманитар ярдәм күләмен арттырырга чакырган.
Тулырак монда укый аласыз.
“Херсон халык республикасы” булдыру турында “референдум” үткәрелмәскә охшаган
Херсон мэры сүзләренчә, Русия гаскәрләре басып алган җирләрне Кырымга кушарга мөмкин. Бу хакта Игорь Колыхаев “НВ” украин басмасына биргән интервьюсында әйткән.
Аның сүзләренчә, “Херсон халык республикасы” булдыру турында “референдум” үткәрелмәскә охшаган.
“Миндә төгәл мәгълүмат юк. Шәһәр халкы белән аралашканда референдум оештырылуы турында ишетмим. Кайчан үткәрергә җыенулары турында әйтүе кыен. Мин референдум булмаячак дип күрәм. Минемчә, алар өлкәне Кырымга кушарга җыена. Тагын бер квазиреспублика ясаудан мәгънә юк. Референдумга әзерлек алып барылмый”, дип белдергән ул.
Моңа кадәр украин хакимияте һәм “Медуза”ның чыганаклары май уртасында Русия тарафыннан басып алынган Херсон өлкәсендә “референдум” үткәрергә җыенулары турында язды. Русия ягы әлегә рәсми рәвештә мондый план булуы турында белдермәде.