BMO-nıñ Ğiraqtağı qoral tikşerüçeläre başlığı Hans Blix häm Xalıqara Atom Energetikası Agentlığı citäkçese Möxämmät äl-Baraday Ğiraqta küpläp üterü qoralları ezläw barışı turında BMO İminlek Şurasına xisap birä.

İminlek Şurasında berençe bulıp çığış yasağan Blix bügen Ğiraq xätta qoralsızlanu taläplären çın-çınlap qabul da itmi kebek dide. Kiçä Blix Ğiraq üzeneñ qoralları turındağı xisabında bulğan buşlıqlarnı tutıra almadı, ğalimnär belän oçraşu mömkinlege birmi, U-2 küzläw oçışlarınnan baş tarta dide.

Bügen Brüssel’dä Yewropa Berlege Ğiraqnı BMO tikşerüçeläre belän tulı xezmättäşlekkä çaqırdı. Yewropa Berlegendäge 15 ilneñ tışqı eşlär ministrları zarur bulğan oçraqta Ğiraqtağı qoral tikşerüçelärgä östämä waqıt birergä teläwlären belderde. Bu belderü Fransiä, Germaniä, Britaniä häm İspaniä tışqı eşlär ministrlarınıñ şul turıdağı elekke belderülären xupladı.

BMO General’ sekretare Kofi Annan da qoral tikşerüçelärgä östämä waqıt birüne xuplap çığış yasadı

AUDİO: Ägär dä alarğa waqıt kiräk ikän, eşlären tämamlaw öçen alarğa waqıt birergä kiräk. Häm bez barıbız da, İminlek Şurası, tikşerüçelärne anda cibärgändä waqıt kiräk bulaçağın añlarğa tieş idek. Min mäñgegä dimim, kiräk qädär waqıt dim. Alarğa eşlären tämamlaw öçen waqıt kiräk häm min İminlek Şurası alarğa waqıt birer dip uylıym.

Bağdadta Ğiraq tışqı eşlär ministrı Naji Sabri Ğiraq BMO tikşerüçeläre belän tulısınça xezmättäşlek itte dide. Kiçä AQŞ däwlät sekretare Colin Powell Ğiraqnıñ qoralsızlanu turındağı yöklämälären ütämäwen raslaw öçen tikşerüçelärneñ Ğiraqta qoral tabu zarurlığı yuq dip äytte.