Yevropa Berlege häm Rusiä Arafatnı söyläşülärdän çitläşterügä qarşı

Yevropa Berlege häm Rusiä, Fälestinnär yulbaşçısı Yasser Arafat belän Yaqın Könçığışta söyläşülärne däwam itüne yaqlıy. Rusiä tışqı eşlär ministrı urınbasarı Alexandr Saltanov, Arafat-säyäsi köçkä iä, İsrael teläge belän genä anı söyläşülärdän çitläşterergä yaramıy, dip belderde. Saltanov süzlärençä Arafat demokratik şartlarda saylanğan citäkçe häm fälestinnär üzläre genä bu turıda qarar birä ala.

Yevropa Berlege prezidentı wazifasında bulğan Gretsiäneñ tışqı eşlär mininistrı George Papandreou, problema-Arafatnı çitläşterüdä tügel, ä "tınıçlıq yulq" kileşüen ğamälgä aşıru, dide.

İsrael, soñğı terror höcümnärenä Arafatnıñ da qatnaşı buluı turında beldergän ide.

Berläşkän Millätlär Oyışması İminlek Şurasınıñ Yaqın Könçığış mäs'äläläre öçen cawaplı wäkile Terje Roed-Larsen, "tınıçlıq yulı" planı-töbäktä totrıqlılıq buldıruğa soñğı mömkinlek bula ala, dip belderde. İsraelgä qarşı intixar höcümnärneñ moral yä säyäsi nigeze yuq, dide Roed-Larsen. Şulay uq, İsraelneñ böten cirdä tikşerü noqtaları häm divarlar quyuı-fälestin iqtisadına zur ziyan kiterä, xäyerçelek häm eşsezlekne arttıra.

Bügen Amerikan prezidentı George Bush häm Fälestin premyer-ministrı Mäxmüd Abbas telefonda söyläşkännär dip xäbär itelä. Bush, Yaqın Könçığışta terrorğa qarşı köräşergä kiräklegenä basım yasağan.