Äfğänstan eçke eşlär ministrı Ali Äxmät Cäläli ildäge iminlek problemaların çişü häm arta baruçı höcümnärne tuqtatu öçen Äfğänstan çittän yardämgä moxtac dide.
Kiçä ilneñ törle öleşlärendä atışlar, şartlawlar näticäsendä 65-läp keşe hälak buldı.
Ülüçelär arasında Qızıl Xaç xezmätkärläre, xatın-qızlar, balalar, xökümät yaqlı xärbilär, Taliban äğzaları häm törle törkemnär suğışçıları da bar.
Bu soñğı ber yıl çaması çorda Äfğänstanda iñ küp qorban kitergän kön buldı.
Eçke eşlär ministrı Helmand ölkäsendä bomba şartlatıp ber aftobustağı 15 keşene üterüne ayıruça ğäyepläp çığış yasadı häm bu wazıyğa terrorçılarnıñ tınıç xalıqqa qarşı höcümnär başlaw mömkinlegen kürsätä dide.
Ul şulay uq küptän tügel terrorçı buluda şiklänelep qulğa alınğan keşelär çittän künegülär häm kürsätmälär aluları turında belderde dide.
Ämma ul ayırım ber ilne dä atap äytmäde.
