Pekiñda bara torğan bu söyläşülärdä Tönyaq häm Könyaq Korealar, Rusiä, Qıtay, AQŞ, Yaponiä qatnaşa. Tönyaq Korea atom qoralı yasıy digän ğäyepläwlär inde 10 ay däwam itüçe xalıqara krizisqa säbäp buldı. Söyläşülär şul krizisnı çişü yulları turında bara.
Altıyaqlı oçraşu çitendä AQŞ häm Tönyaq Korea wäkilläre ğäyre räsmi ikeyaqlı oçraşu da ütkärde.
Söyläşülärdä qatnaşuçı Rusiä wäkile, tışqı eşlär ministrı urınbasarı Aleksandr Losükov Tönyaq Korea haman da, üzeneñ atom qorılmalarında tikşerülärgä rizalıq öçen Quşma Ştatlarnıñ iminlek garantiäläwen taläp itä dide.
İtar-Tass xäbär itüençä, Losükov Tönyaq Korea Quşma Ştatlardan höcüm itmäw turında garantiä alğan oçraqta üzeneñ atom programmasınnan baş tartırğa mömkin dip äytkän.
Ämma AQŞ häm anıñ berektäşläre bulğan Yaponiä belän Könyaq Korea Pxenyannı berşartsız qoralsızlanırğa çaqıra häm annan soñ ğına çigeneşlär yararğa äzer buluın belderä.
