Üzbäkstan prezidentı İslam Kärimov Paqstanda xärbi çara waqıtında qulğa alınğan barlıq üzbäk suğışçıların Taşkentqa tapşırunı sorıy. Üzbäkstan xökümäte bu xaqta Paqstan ilçelegenä möräcäğät itkän. Prezident Kärimov, Paqstan yağı bezneñ bu taläpkä qarşı çıqmas, dip ömetlänäm, dide.
Mäğlüm bulğança, Paqstannıñ Äfğanstan belän çiktäş Könyaq Waziristan provinsiäsendä Al-Qaida suğışçıları qaçıp yata digän farazlar bar häm Paqstan xärbi köçläre anda maxsus çara uzdıra. Kimendä 123 keşe qulğa alınğan, alar arasında üzbäklär, çeçennar, paqstanlılar, ğaräplär häm etnik uyğurlar bar. Uzğan töndä bulğan bäreleşlärdä Paqstannıñ 12 xärbie hälak bulğan, 15 keşe yaralanğan, dip xäbär itelä.
