Qazanda bu könnärdä mäktäp uquçılarınıñ Tarix fäne buyınça olimpiadası bara. Anda Rusiäneñ 56 töbägennän respublika häm ölkä bäygelärendä ciñügä ireşkän balalar qatnaşa. 2003 yılda bu çara Sankt-Piterburgta uzıp, şuşı şähärneñ tarixına bağışlansa, bıyılğı olimpiadanıñ üzençälege şunda – ul başqalabıznıñ meñyıllığına bağışlanıp ütä. Älege täqdim belän Qazan şähäre xakimiäte çıqtı, ä Rusiäneñ Mäğärif ministrlığı moña qarşı kilmäde. Oyıştıruçılar süzlärenä qarağanda, bu bäygeneñ biremnäre, sorawları arasında milli-regional komponent qısalarında Qazanğa, anıñ meñyıllıq tarixına bağışlanğan sorawlar da bar. Alay ğına da tügel, olimpiada barışında, 22 aprel’ könne, Qazan köne dä ütkäreläçäk. Bu könne bäygedä qatnaşuçılar Qazan däwlät universitetı belän tanışıp, anda ütäçäk başqala tarixına bağışlanğan viktorinada üz köçlären sınap qarıy alaçaqlar. Şul uq pänceşämbe könne olimpiadanıñ final öleşe dä ütäçäk. Anda bäygeneñ soñğı öleşenä ütkän 20 uquçıdan 9 bala ciñüçe dip tabılaçaq. Olimpiada nigezdä Qazannıñ iñ yaxşı mäktäpläreneñ berse – Mäskäw rayonında urnaşqan 102 gimnaziädä ütä. Xäyer, Qazanda uza torğan älege çaranıñ programması bäygelärdän tış ta bik monda. Başqala qunaqları Qazan, anıñ tarixı, respublika belän tanışa, törle mäktäplärendä bula, şähärneñ citäkçeläre belän oçraşa. Uquçılarnı alıp kilüçe uqıtuçılar da onıtılmağan. Alar öçen törle seminarlar, ğalimnär häm alarnıñ Tatarstandağı kollegaları belän oçraşular, täcribä urtaqlaşular qaralğan. Tarix buyınça olimpiada 23 aprel’gä qädär däwam itäçäk.
Gölnaz İlgizär
