Öç kön däwam itkän bäyrämnärdän soñ respublika eşkä kereşä. Döres, bu könnärdä awıl keşeläre barıber basulardan qaytmadı. Xäzer börteklelärneñ 80 protsentı cıyılğan. 3 million 600 meñ tonna igen suğıp alınğan. Rusiä şartlarında bu bik zur san. Tatarstan kebek şundıy zur respublikada här gektardan 27,4 sentner igen cıyu uñdırışlı tufraqlı könyaq töbäkläreneñ kürsätkeçen dä arttıra. Ä Samara ölkäse çigendäge Norlat rayonında ayırım basularda ğına tügel, ä urtaça, ğomumi kürsätkeç här gektardan 50 sentnerdan artıq. Tatar xalqınıñ milli tormışı menä şul tuzanlı, tirle awıl eşendä däwam itkängä, älege norlatlılar rekordın Olimpiä yarışların küzätkän kebek tanışalar.
Düşämbe könne Tatarstan prezidentı Mintimer Şäymiev Rusiä statistika xezmäte citäkçese Vladimir Sokolin belän oçraştı. Räsmi mäğlümätlärgä qarağanda, söyläşü sotsial'-iqtisadi üseştä statistikanıñ ähämiäte, 2006 yılda Rusiädä awıl xucalığındağı cirlär, awıllar, terleklär sanın aluğa äzerlek turında süz barğan. Döres, 2002 yılda ütkän xalıq sanın alğannan soñ, töbäklärdä yäşäwçelärneñ milli sostavı mäğlümatlär iğlan itelmäde, milli eçtälekle 4 tom yomğaqları haman basılıp çıqmağan. Monıñ xikmäten añlatuçı yuq.
Qazanğa Tatarstan möstäqillege bäyrämendä qatnaşırğa ğına tügel, ä kreditlar birü xaqında söyläşergä Dönya bankınıñ Rusiädäge wäkile Kristalina Georgieva kilgän ide. Bu mölayım xanım bäyräm çaralarında prezidentnıñ töp qunağı bulıp yörde. Qazannıñ sotsial' üseşenä Rusiä garantiäse belän 125 million dollar kredit bireläçäk. Ämma şartı bar – aqçalar kilgänçä respublikada cirle üzidarä buyınça qanun qabul itelergä tieş. Qazanda Koreya bankirları häm LG kompaniäse wäkilläre belän dä oçraşu buldı. Urtaq şirkät tözep, neft' eşkärtüne üsterep cibäräçäk.
Här yılnı 31 avgustta Alabuğada şağirä Marina Svetaeva könnäre ütä. 1941 yılnı näq menä şuşı könne ul üz-üzenä qul salğan. Bu könnär quanıçqa, ciñü şatlığına ğına tügel, qayğılı waqiğalarğa da bäyle. İke yıl elek respublika bäyrämennän soñ üze yäşägän Ägerce rayonına qaytqan waqıtta, awıl uramında şuşı rayonnıñ xakimiät başlığı Räfis Säitov yallanğan üterüçelär tarafınnan atılğan ide. Xäzer şuşı cinayät eşe mäxkämädä.
Yäkşämbe kiçendä Qazanğa tağın ber qayğılı xäbär kilde. Mäskäwdä ataqlı xirurg häm cämäğät eşleklese Rinat Aqçurinnıñ ulı Andrey yal könne atılıp ülgän. Ällä yalğışlıq belän, ällä başqa säbäplärdän Andrey Aqçurin äniseneñ küz aldında atılu teträndergeç xäbär. Tatarstannıñ citäkçese dairäläre ataqlı millättäşneñ qayğısın urtaqlaştılar. Düşämbe könne Troekurov ziratında Andreynı kümüdä qatnaşu öçen Tatarstannıñ Sälämätlek ministrı Kamil Zıyätdinov kitte. Bu çetrekle häm Aqçurinnar ğailäse öçen bik awır xäbärne Qazanda bik kiñ taratmadılar. Ämma Komsomol'skaya pravda gäciteneñ sişämbe sanınıñ berençe bitendä Rinat Aqçurinnıñ häm anıñ ulınıñ räsemnäre basılğan ide.
Şunıñ belän qayğılı xäbärlärne tuqtatıp torsaq ta yarar ide. Läkin sişämbe könne irtänge säğät 5tä Qırımdağı Tesel' dip atalğan yal yortında Tatarstannıñ Konstitutsion mäxqämäse räise, möstäqillek alğan yıllarda respublika prokurorı bulıp eşlägän Säyfixan Näfievnıñ kötelmägändä wafat buluı mäğlüm buldı. Säyfixan Näfiev 1941 yılda Tatarstannıñ Çüpräle rayonında tuğan, Bögelmä, Qazan prokurorı bulıp eşlägän keşe. Säyfixan Näfiev oçqıç belän Qazanğa qaytarıla. Anıñ wafatı respublika cämäğätçelege häm xalqı öçen bik zur qayğı.
Tormışta aq häm qara tasmalar menä şulay aralaşıp bara ul. İñ soñğı xäbär dä moñsuraq. Bauman uramındağı Yoldızlar alleyasında tağın ber taş yoldız açıldı. Aña tatar xalqınıñ mäşhür cırçısı, berniçä yıl elek waqıtsız arabızdan kitkän Xäydär Bigiçev iseme yazılğan. Keşe kitä, iseme qala, istäleklär qala.
Rimzil Wäli
