Ütkän atna tapşıruında, Beslan faciğäse xaqında tatar forumnarında ber süz dä bulmadı, dip äytkän idek. İnde bu atnada xäl kisken üzgärde. İñ polulär forumnarda, Tönyaq Osetiädäge xällär xaqında bik aktiv töstä fiker alışu bardı. Mäsälän, tatforum.at.tt saytında söyläşü sentäberneñ berençe könnärennän başlap, bügengäçä däwam itte. Şunısı qızıqlı. Küplärgä mäğlüm «Millätçe» isemle idäräçe, forumğa turıdan yöri torğan yulnı yapqan häm terkäw kertkän. Elek terkälmiçä yazıp bulmasa, xäzer uqıp ta bulmıy. Şulay itep terkälü uzarğa kiräk. Läkin, ul idäräçe tarafınnan mäğlümatlar tikşerüen kötä torğan terkälü tügel. «Millätçe» äfände barı tik ber niçä soraw'a cawap birüne soradı. Mäsälän, .«..tatarlar yazunı saylarğa xoquqlımı?, ...manqortlarğa mönäsäbätegez niçek, millätçelär eşenä niçek qarıysız, Tatarstan möstäqil däwlät bulırğa tieşme?» Häm başqa şundıy sorawlar birelä. İnde terkälü uzğannan soñ, forumda ber totqarlanmıyça qatnaşıp bula.
Şulay itep, Tönyaq Osetiädäge xällär xaqında söyläşüdä, tatarlar, üzlären qazaq, nuğay häm slavyan dip tanuçı yäşlär qatnaştı. Alar waqiğalarnıñ barışın başqa mäğlümat çaralarında küzätep, üz mönäsäbätlären şuşı forumda belderep bardı. Küpçelek fikerlärneñ eçtälege, räsmi mäğlümat çaralarına häm xärbilärgä ışanmawğa qaytıp qaldı. Forumçılar, soñınnan millät ara nizağnıñ kilep çığu qurqınıçı xaqında da fiker alıştı. Bigräktä terrorçılar arasında, tatarlarnıñ bulu- bulmawı alarnı borçuğa saldı.«Tatarskaya gazeta» konferensiäsendä,«terrorçılar arasında tatarlarnıñ bulu xäbäre provokatsiägä oxşağan» , dip yazıp çıqtı ber forumçı. «Gäzitlärgä 100% ışanırğa yaramıy», dip yazıp çıqtı başqa forumçılar. Öçençe ber keşe,«.. tatarlar da bula ala...», digän fiker belderde. Beslandağı balalarnı üterüçelär arasında tatarlarnıñ bulu mömkinlege, Qazanda tawışsız panika kiterep çığardı, dip yazıp çıqtı ber şähär gäzite. Bu mäqälä küp kenä elektron mäğlümat çaralarında kürende. Tatarstan xakimiätläre, Qazaqstan sıman, baş prokuraturadan añlatmalar soramadı. Gäzit monı ike säbäptän añlata. Berençedän, tawış quptaru kiräk tügel, ikençedän, alar bulırğa da mömkin. Şul uq waqıtta, gäzit, terrorçılar törkemenä küp sanlı millät wäkillären kertü, millät ara nizağnı kiterep çığaru maqsatın quya, dip yaza. Älege mäqälägä, tatar forumnarda utıruçılar mönäsäbät beldermäde. Alarnıñ kileşüen, yäki avtorlar belän riza bulmawların belep bulmadı.
Bikä Timerova.
