Fälestin xakimiäte başlığı Mahmud Abbas, Gazada urnaştırılğan fälestin iminlek köçläre İzrael höcümnärenä dä qarşı toraçaq, dip belderde. "Bügen fälestin iminlek köçläre Gaza sızığındağı çik buyına urnaştırıldı. Elegräk bu mömkin tügel ide, ämma xäzer bu eşne başqaru kiräk buldı häm alar çik buyında üzläreneñ milli iminlek köçläre bularaq burıçların ütiäçäk" dide Abbas.
İminlek köçläre çik buyına fälestin suğışçılarınıñ İzraelgä höcümnär buldırmas öçen quyıldı. Gazada comğa namazınnan soñ yasağan çığışında, Abbas – iminlek köçläreneñ maqsatı – çik buyın här törle höcümnärdän saqlaw, dip belderde.
İzrael, ägär fälestin xakimiäte qorallı fälestin suğışçılarına qarşı çaralar kürmäsä, Gazada xärbi çara başlayaçağı belän yanağan ide.
