Qazannıñ 1000 yıllığına äzerlek çaraları munisipal reforma kebek külämle eşneñ tormışqa aşırıluın qaplap kitä almıy. Başqala yubileye ütep kitäçäk, annan soñ, cirle üz idärä oyışmalarına saylawlar ütkärü planğa kertelgän. 11nçe mayda, Däwlät Şurasında munisipal reformağa bağışlanğan uqular ütte. Anda, Tatarstan rayonnarında cirle deputat şuraları citäkçeläre çaqırılğan ide. Xakimiätlär, cirle üz idärä oyışmaların tözegendä, töp ömetlärne şuşı keşelärgä bağlıy. Saylawlar sentäbergä bilgelängän, ä üzidarä oyışmalarnıñ nindi buluı, alarnıñ qanunı nigezläre, eş tärtipläre, byudjet tuplaw mäs’äläläre açıqlanıp betmägän. Äle üz idärä turındağı qanun da, küptän tügel genä qabul itelde. Andıy tör xakimiätneñ dä moña qädär bulğanı yuq. Uqularda çığış yasağan parlament räise urınbasarı Rimma Ratnikova, Rusiädä cirle üz idärä reforması bik awır bara, dip xällärneñ torışı belän tanıştırğan. Xökümät räise urınbasarı Rawil Moratov, cirle deputatlarnıñ sorawlarına cawap birgän. Rawil Muratov, cirle üz idärä oyışmalarında, eş xaqı alıp eşli torğan 1 genä keşene qaldırırğa täqdim itkän. Çönki, xökümät, munisapal idärälärdä eşli torğan keşelärgä eş xaqın kütärä almıy, barı eşçelär sanın ğına qısqartırğa täqdim itä ala. Bu täqdim, cirle deputatlar arasında bäxäs kiterep çığardı, dip xäbär itä «Tatar-inform» agentlığı. Cirle üz idärä oyışmaları däwlättän bäysez bulırğa tieş. Alarnıñ byudjetları, başqarma xakimiät birgän qayber salımnardan tuplanır, dip kötelä. Maxsus fondlar da oyıştırılırğa tieş. Ämma, awıllardağı xälne yaxşı belgän cirle deputatlar, salımnardan citärlek aqça cıyıluına şiklänep qarıy. Üz idärä oyışmalarında eşläwçelärneñ eş xaqı mäs’äläsen niçek xäl itärgä digän sorawğa, xökümät wäkile üz cawabın birgän. Rawil Moratov, cirle üz idärälärgä başqarma xakimiät wäqälätlären birgändä, 1 eşläwçe keşegä 4 meñ sum külämendäge eş xaqın da respublika byudjetınnan birergä bula, digän täqdim kertkän.
Munisipal okruglarda saylawlar ütkärü dä bügenge köndä iñ qatlawlı mäs’älä bulıp tora. Saylaw komissiälären oyıştıru, nämzätlärne kürsätü, tulı qanlı saylaw aldı kompaniäsen ütkärü kiräk bulaçaq. Bu eşne qanun çığaru xakimiäte iğtibar üzägennän çığarmıy. Yaña qanun buyınça saylawlar ütkärü häm yaña sıyfattağı idärä oyışmaların tözergä, rayon deputatları tağın 2 kön öyränäçäk.
Bikä Timerova.
