Pasportqa yaulıqtan töşüne dawlağan, uramdağı äxlaqsız yazular, sıraxanälär, tönge klublar belän köräşkän bu oyışmanıñ qazanışları bik küp. Un yıldan artıq cämäğät oyışması bulıp torğannan soñ, nihat' ul räsmi räweştä terkälde. Düşämbedä Tinçurin teatrında uzğan möslimälär qorıltayında küp kenä soraw kütärelde. Läkin töp mäs'älä öçäw ide: möslimälärneñ eşçänlegen tikşerü, oyışmanıñ başlığın saylaw häm rezolyutsiä qabul itü.
Möslimälärne iñ borçığan sorawlarnıñ berse olılarnı ğına öyrätep qalu tügel, ä keçe buınğa da islam tärbiäsen birü buldı. Bu xaqta möslimälär qorıltay utırışı aldınnan da fiker alıştı. Älege fiker qorıltay däwamında da iñ ähämiätlese buldı. Qorıltayda qatnaşqan Tatarstan premyer-ministrı urınbasarı - mädäniät ministrı Zilä Wälieva da bu mäs’älägä ayıruça iğtibar itte. Ul bigräk tä yätimnär yazmışı xaqında uylanırğa çaqırdı
Bezneñ töp maqsat yätimlekne yuqqa çığaru. Bügen bezneñ däwlät älege balalarnı ğailälärgä urnaştıruğa qağılışlı programma äzerli Möslimälär qorıltayında küp mäs'älälär kütärelde. Censi azğınlıq, narkomaniä, eçkeçelek häm başqalar. Küplärne azart uyın qorbannarına äwereldergän uram avtomatları da çittä qalmadı.
Bügenge qatlawlı, küpmillätle häm küpdinle cämğiättä möslimälärneñ dini mänfägat'lären yaqlap, däwlätneñ tulı xoquqlı wäkile bulıp qalu öçen yärdäm itü kebek mäs'älälär Tatarstan möslimäläre berlege eşçänlegeneñ töp yunäläşläre sanala. Çişeläse problemalar äle bik küp, ämma alarnı xäl itü öçen cawaplı häm fidaqär şäxeslär kiräk. Un yıldan artıq Tatarstan möslimälären Älmirä xanım Ädiätullina citäkläp kilde. Möselman xatın-qızlar öçen çığuçı berdänber “Möslimä” gäziteneñ baş möxärrire Älmirä xanım bügen möslimälär berlege sostavı äğzası bulıp qaldı. Ä berlekneñ citäkçese itep isä Diniä Näzaräteneñ mäğärif bülege xezmätkäre Nailä Cihanşina saylandı. Döres, Nailä xanım äle bik yäş, ämma ul şäriğät qanunnarı buyınça balalarnı tärbiäläwdä zur köç quyıp, üzen tanıtıp ölgergän inde.
Älege utırış qayberäwlär äytüençä, dönyada kiñ taralğan feminizmnı xäterlätä kebek. Ni öçen soñ äle xatın-qızlar irlärdän ayırılıp eş itä. Älege soraw belän bez turıdan-turı möslimälär berlegeneñ citäkçesenä möräcäğät ittek
Bezneñ islam dine ul yaqtan totıp ala. Zur eşlärne tormışqa aşıruda bez, xatın-qızlar, irlärne därtländerep tä cibärergä tieş. Xatın-qızlar küp problemalı cämğiättä yäşi. Häm min uylıym, xatın-qız xatın-qıznı yaxşıraq añlıy. Xatın-qıznıñ qulında ğailä, tärbiä.Päygambärneñ xädise buyınça, ir-tän, ä xatın-qız ul can bula. Bu oçraqta da, bar närsäne däwlätkä genä qaytarıp qalu döres bulmastır. Can atıp, üz östenä millätneñ ruxi tärbiäsen aluçı xanımnar bulğanda, kiläçägebez ömetle kürenä.
Ädilä Gaynetdin, Al'bina Zäynulla
