Татарстан Аксакаллар шурасы Азатлык радиосында татар-башкорт дөньясының "Ел шәхесе"н сайлауга Татар иҗтимагый үзәге рәисе Фәрит Зәкиевне намзәт буларак тәкъдим итте.
"Без, Татарстан республикасы Аксакаллар шурасы, асылда "90нчы еллар калдыклары", ошбу 2020 Ел шәхесе итеп Бөтентатар иҗтимагый үзәге (БТИҮ) рәисе Фәрит Зәкиевне тәкъдим итәбез һәм аны намзәтләр исемлегенә кертүне сорыйбыз", диелә хатта.
Аксакаллар шурасы, 2020 елның урам чаралары өчен кыен булуына карамастан, Фәрит Зәкиевнең быелгы Хәтер көне митингын уздыруга ирешүен, татар халкы һәм Татарстан мәнфәгатьләрен яклаучы сәяси активлыклары өчен мәхкәмәләр юлын таптавын, штраф җәзасына тартылуын исәпкә алырга чакыра.
Аксакаллар шурасының мөрәҗәгате Татарстандагы һәм федераль дәрәҗәдәге башка киңкүләм мәгълүмат чараларына да җибәрелгән.
Азатлык радиосында Ел шәхесен сайлау өчен тавыш бирү дәвам итә. Исемлектә 9 намзәт бар. Шулай ук һәркемгә үз намзәтен тәкъдим итү мөмкинлеге бирелә. Тавыш бирүгә йомгак ел тәмамланганда ясалачак.