Änkara. Kipr törekläreneñ citäkçese Räüf Denktaş bügen, ikegä bülengän şuşı utrawnıñ kiläçäge xaqında Kiprnıñ grek yağı belän, kiläse martta kileşügä ireşügä ömetlänüwen äytte. Änkara hawa alanında ul xäbärçelärgä, monıñ öçen üz yağınnan bar närsäne dä eşliyäçägen belderde. Berük waqıtta Denktaş, Berläşkän Millätlär, Yewropa Berlege, häm xätta qayber törek kipriotları yağınnan, BMO äzerlägän plannı qabul itü öçen yasalğan basımğa işarä itep, kemneñ dä bulsa basımına birelü xaqında süz dä bula almıy dip belderde. Berläşkän Millätlär Oyışması äzerlägän planda, Kiprnıñ xäzerge tösle törek häm grek yağına bülenep yäşäwenä, anda konfederatsiä tözep çik quyu qaralğan. Comğa könne Denktaş, distälägän meñ törek kipriotınıñ, üzenä qarşı, anıñ Kiprnı berläşterü mäs’äläsendäge qatılığına qarşı ütkärelgän çıyının, laf oru dip bäyälägän ide. Ul şulay uq, utrawnıñ grek yağı belän, ğinwarnıñ 7-sendä yañartılaçaq solıx söyläşüläre, sabırlıq häm salqın ğaqıl taläp itä dip tä östäde.
