Uzğan töndä Çexiä prezidentı Vaclav Havelnıñ prezidentlıq möddäte çıqtı. Prezident sarayı östendä bügen prezident bayrağı yuq. Komunistlar çorında disident-yazuçı bulğan Vaclav Havel, başta Çexoslovakia, annarı Çexiäneñ, barlığı 13 yıl buyna prezidentı bulıp tordı. 93-tä Slovakiädän ayırılğannan birle Çexiä berençe tapqır prezidentsız qaldı. Uzğan ayda Parlamentta yaña prezident saylaw tırışlıqları näticä birmäde. Vaclav Havel, üz wäkälätlären waqıtlıça premeir-ministr Vladimir Şpidla häm Tübän palata räise Lubomir Zaoralekka tapşırıp, yalğa kitte. Kiçä televidenie aşa yasağan çığışında Havel, min prezident bularaq xuşlaşam, watandaş bularaq sezneñ belän qalam, dide. Vaclav Havel, komunizmnan küçeş çorınıñ berençe yıllarında citäkçelek itte. Anıñ citäkçelege astında Çexiä 1999da NATO äğzası buldı, uzğan yıl Yevropa Berlegenä çaqıru aldı.
