Uzğan atnanıñ comğasında Amerika Quşma Ştatları, Britaniä häm İspaniäneñ Berläşkän Millätlär Oyışması İminlek Şurasına tapşırğan rezolyutsiäse mäs’äläsendä qarar bu atnada çığarılırğa tieş. Qıtay bügen, Ğiraqta çikläwlärne beterü turındağı rezolyutsiägä qarata “konstruktiv” qaraşta bulğanın belderde, yağni Qıtay räsmiläre-qabul itelgän qararlar berençe çiratta Ğiraq xalqı öçen uñay bulırğa tieş digän fikerdä.
Bügen irtän Fransiä tışqı eşlär ministrı Dominique de Villepin, resloyutsiä ölgeseneñ qayber maddälärenä rizasızlıq belderep, Ğiraqnı tözekländerügä Berläşkän Millätlär Oyışması häm başqa xalıqara oyışmalar kübräk qatnaşırğa tieş, dip belderde. Kiçä kiç Londonda, Britaniä saqlanu ministrı Geoff Hoon, Amerika Quşma Ştatları häm Britaniägä Ğiraqta yaña xökümät tözer öçen Berläşkän Millätlärneñ wäkäläte kiräk bulaçaq, digän ide.
Paul Bremer bügen Ğiraqnıñ waqıtlı xakimiäte başlığı bularaq üzeneñ berençe eş könen uzdırdı. Bremerneñ bügenge köndäge töp maqsatları-elektr utın qaytaru, iminlek buldıru, Bağdadta häm Ğiraqnıñ başqa töbäklärendä çista su häm başqa sistemalarnı yañartu.
Bügen Bağdadta Fälestin Otele qarşına Ğiraqta monarxiäne torğızu yaqlı 100gä yaqın keşe cıyılğan dip xäbär itelde. Şulay uq könçığış Ğiraqta, Ğiraqnıñ isemen “Ğiraq respublikası” yä “Demokratik Ğiraq respublikası” isemenä alıştırunı taläp itüçelär uramnarğa çıqqan.
