Fälestin ministrı Saeb Erekat, avtonomiäneñ yaña citäkçesen saylaw uñışlı bulırğa tieş, dip belderde. İzrael televideniäsenä birgän äñgämäsendä, Erekat, saylaw prosessında xatalar bulğan xäldä "yañadan köç qullanu başlanu ixtimalı bar" dip belderde. Kiçä saylaw köne ğinwarnıñ 9zına bilgelände. Erekat süzlärenä qarağanda, tawış birü şuşı waqıtta uzdırılsa, fälestin citäkçelege tärtip häm qanun xakimiäte urnaştıra alaçaq. Kiçä Gaza şähärendä Arafatnıñ Fatah xäräkäte suğışçıları häm Fälestinne Azat İtü Oyışmasınıñ yaña citäkçese Mähmüd Abbas'nıñ tän saqçıları arasında atışular buldı. Erekat borçılu belderde, Abbas üze isä – bu waqiğağa zur iğtibar birmäskä çaqırdı: "Prezident Arafatnıñ wafatınnan soñ xislär tulıp kitüneñ näticäse ide bu. Keşe küp ide anda, şuña da añlaşılmawçanlıq tudı. Hawağa ut açtılar, bez keşelärgä taralışırğa quştıq, üzebez dä kittek, şul ğına", dide Abbas. Fatah tarafdarları Abbas, amerikannarnıñ agentı, dip qıçqırdı. İke keşe hälak buldı.
