Misır aradaşçıları, ber atna elek urlanğan, İzrail xärbien azat itü öçen fälästin ğıysyançıları belän söyläşülär alıp bara. Fälästin avtonomiäse başlığı Mäxmüt Abbas bolay dide: “Bez wäzğıyatne tağın da kierenkelätmäs öçen quldan kilgänneñ barsın da eşlibez. Bez häm bezneñ ğäräp duslar, bigräk tä misırlılar, bu qatlawlı xäldän çığu yulların tabu öçen böten köçne quyabız”. Ämma, älegä, zur tırışlıqlarğa qarmastan söyläşülär uñış kitermäde. Häm fälästin xakimiateneñ qayber wäkilläre fikerençä, näticäsezlekkä bik yaqın. İzrail premer-ministrı Ähüd Olmert, izrail xärbien azat itü öçen, ğaskärlärgä böten köçne qullanırğa färman birde. İzrail xärbie azat itelgänçe, XÄMÄS qorılmalarına xöcümnär däwam itäçäk. Bu kisätü belän yäkşämbe İzrailneñ eçke eşlär ministrı Ronni Bar-On da çığış yasadı. Aña qädär berniçä säğät aldan İzrail, XÄMÄS başlığı, Fälästin avtonomiäse premer-ministrı İsmail Xaniinıñ eş binasın, hawadan bombaladı. Xanii üze anda yuq ide. Citdi zıyan kürüçelär bulmadı. İzrailneñ tağın ber xöcüme waqıtında, Ğaza sızığınıñ tönyäğında XÄMÄS äğzası üterelde.
