Accessibility links

Кайнар хәбәр

İzmestyev 10 köngä totqarlaw üzägendä qala


Mäskäw mäxkamäse Federatsiä Şurasındağı elekke Başqortstan wäkile, bu atnada Bişkäktä totqarlanğan İgor İzmestyevnı 10 köngä totqarlaw üzägendä qaldıru turında qarar çığardı. İzmestyev keşe üterü oyıştıruda ğäyeplänä. Kiçä Kommersant gazetı İzmestyev çärşämbe könne Bişkäktä Rusiä häm Qırğızstan iminlek xezmätläre tarafınnan totılıp oçqıç belän Novosibirski aşa Mäskäwgä kiterelgän dip xäbär itkän ide. Kommersant yazuınça, İzmestyevnıñ advokatı Vladimir Sementsov ul qulğa alu röxsäte bulmaw säbäple üzen qanunsız räweştä totıp alıp kitkännär dip isäpli dip äytkän. Qırğız räsmiläre İzmestyevnıñ Bişkäktä qulğa alınğanlığın raslıy. Qırğızstan baş prokuraturası süzçese Toktoğul Kakçekeev Azatlıq radiosına İzmestyevnıñ Qırğızstanda tatıluı qanun bozu tügel dip isäpläwen äytte. "Bu oçraqqa kilgändä, oyışqan cinayätçelekkä qarşı Rusiä belän Qırğızstan arasındağı xezmättäşlek qanunnar häm ike il arasındağı kileşülär belän bilgelänä" dide Kakçekeyev. İzmestyev käsepçelek belän dä şöğellängän öçen uzğan ayda Federatsiä Şurasındağı Başqortstan wäkile wazıyfasınnan alınğan ide.
XS
SM
MD
LG