Äfğanstandağı NATO köçläre wäkile polkovnik Tom Collins, NATO, könyaqtağı Musa Qala şähären äfğan xökümäte ğaskärläre üz kontrolenä alır dip kötä, dide. Uzğan atnada bu şähärne Taliban köçläre yawlap alğan ide. NATO köçläre xökümät ğaskärlärenä yardäm itergä äzer, ämma üzlärenä höcümne başlarğa aşığıç ixtiyac yuq, dide polkovnik. Musa Qalada xärbi çaralar başlansa, räsmi mäğlümatlärgäq qarağanda, meñ yarım ğailä şähärdän kitergä äzer tora. Äfğanstannıñ könyağındağı Qandahar şähärendä ike bomba şartlap 5 keşe häläk buldı. Berläşkän Millätlär Oyışmasınıñ keşe xoquqları komissionerı Louise Arbour, äfğan xökümäteneñ, soñğı yıllarda xärbi nizaqlarda qatnaşqan barlıq äfğannarğa yarlıqaw iğlan itü qararın täñqitläp çıqtı. Suğış cinäyätlären tikşerüçe törkemnär kisätüenä qaramastan qanun 31 ğinwar könne qabul itelde.
