Xalıqara iminlek mäsälälärenä bağışlanğan cıyınnıñ ikençe könendä, bügen AQŞ saqlanu ministrı Robert Gates, ägär dä Quşma Ştatlar Ğiraqta tınıçlıq urnaştıra almasa, monıñ täsiren NATOnıñ här äğzası üzendä sizäçäk, dip belderde. Ğiraqta idarä iterlek xökümät häm üz üzen saqlıy alırlıq däwlät bulmasa – bu Yaqın Könçığışta yaña nizaqlarğa kiterergä mömkin, dide Gates. Şulay uq AQŞ saqlanu ministrı NATOnı Rusiä belän iminlek mäsälälärendä xezmättäşlek itergä çaqırdı. "Ber salqın suğış citärlek buldı", dide Gates. Kiçä Münxenda yasağan çığışında, Rusiä prezidentı Vladimir Putin, Quşma Ştatlarnı, dönyadağı wazğiätne qurqınıç astına quyuda ğäyepläp çıqtı. Rusiä saqlanu ministrı Sergei İvanov bügen Rusiä häm NATOğa urtaq raketalardan saqlanu sistemın buldırırğa täqdim itte. NATO belän Rusiä arasındağı xezmättäşlek – Rusiä häm Yevropa illäre iminlegenä fayda kiteräçäk, dide İvanov.
