Accessibility links

Кайнар хәбәр

Ğiraqta yök poyezdın şartlatıldı, AQŞ xärbiläre Tikritta tentülär ütkärde


Ğiraqnıñ Falluca şähäre yanında bilgesez keşelär yök poyezdın şartlattı häm AQŞ xärbiläre Säddam Xösäinneñ tuğan şähäre Tikritta tentülär ütkärde. Poyezdğa quldan yasalğan bomba höcüme näticäsendä yaralanuçılar yuq. Anda suğış häm meditsina kiräk yaraqları, computerlar häm başqa törle tawarlar bulğan. Tirä yaqta yäşäwçe xalıq poyezdağı äyberlärneñ küpçelegen talağan. AQŞ xärbiläre äytüençä, Tikrittağı tikşerülär näticäsendä 4 keşe totqarlanğan. Soñğı waqıtta biredä xärbilärgä höcümnär yışayıp kitkän ide. Qayber xalıqara humanitar häm yardäm oyışmaları Ğiraqta xalıqara xezmätkärlär sanın kimetä. Soñğı waqıtta Ğiraqta xalıqara yardäm oyışmalarına qarşı da höcümnär buldı. Düşämbe könne Xalıqara Qızıl Xaç oyışmasınıñ Bağdadtağı idaräse qarşında intixarçı bomba şartlattı. Bügen Jenevada oyışma citäkçeläre Bağdadtağı xalıqara xezmätkärlärne kimetep Ğiraqtağı eşçänlekne tuqtatmaw turında söyläşä. Oyışma wäkile Nada Dumani Qızıl Xaç Ğiraqtağı aktivistlar sanın kimetergä teli, ämma mömkin bulsa bik nıq kimetmäskä tırışa dide:

AUDİO: Bez xezmätkärlär kimetelgännän soñ anda küpme keşe qalırğa tieşlege turında äle dä qarar qabul itmädek. Bez aldağı könnärdä Bağdadtan çittä, Genevada şul turıda da söyläşäçäkbez.

BMO wäkile Marie Oaks äytüençä, BMO Ğiraqtan üzeneñ ğiraqlı bulmağan xezmätkärlären çığara başlağan, çit il xezmätkärläre İordaniädän dä çığara.
XS
SM
MD
LG