Prezident G. Bushnıñ milli iminlek kiñäşçese Condoleeza Rice, 11 sintäbr terror höcümnären tikşergän bäysez komissiäqarşında çığış yasadı. Baştan uq Rice, soñğı 20 yılda prezident xakimiäte islam terrorınıñ üsüenä döres reaksiä kürsätä almadı, ämma Bush Al Qaidanı yuq itüne – 2001nçe yılnıñ ğinwarınnan uq üz säyäsäteneñ töp maqsatlarınıñ berse itep quydı, dide.
Condileeza Rice, 2 distä yılğa yaqın Osama bin Ladennıñ Al Qaida çeltärennän kilgän qurqınıç arta barsa da, Amerika Quşma Ştatlarınıñ aña qarşı torırğa äzer bulmağanın tanıdı. Ämma Bush qurqınıç yanağanın añladı häm anı yuq itergä kiräklegen belderde, dide Rice: "Yaña Bush xakimiäte strategiäse maqsatlarınıñ berse – Al Qaidanı cimerü. Amerikadağı idarälär häm agentlıqlar citäkçelegenä – Al Qaidanı yuq itü färmanı birelde, monıñ öçen ildäge barlıq köçlärne – küzläw xezmäte, finans, diplomatik häm xärbi köçlärne cälep itü kiräklege turında äytelde" dide Condoleeza Rice.
Elekke terrorğa qarşı köräş idaräse başlığı Richard Clarke'tan ayırmalı bularaq, Rice höcümnärne buldırmasqa tırışlıq kürelmägäne öçen ğafu itenmäde. Richard Clarke bu belderüne 2 atna elek yasağan ide. Monıñ urnına Condoleeza Rice – 11 sintäbr könne bulğan qayğı häm açu xisläre turında söyläde.
