Putin Yewropa Berlege belän Rusiä arasında kiçekterelgän sammit bu yıl axırına bilgelängännän soñ berlek belän nıqlı dialogqa ömetlänüe turında äytte.
Xäzerge waqıtta Berlekne citäkläwçe Niderland baştaraq bu pänceşämbegä bilgelängän yuğarı däräcä oçraşunıñ Mäskäw sorawı nigezendä kiçekterelüen iğlan itte.
İtar-Tass agentlığı xäbär itüençä, Putin bu oçraşunıñ Jose Manuel Barroso citäkçelegendäge yaña Yewropa Komissiäse qatnaşında ütüen teläwe turında beldergän.
Putinnıñ Yewropa Berlege mäs'äläläre öçen cawaplı maxsus wäkile Sergey Yasterjembski Mäskäwdä jurnalistlarğa Rusiä Yewropa Berlege belän maxsus mönäsäbätlär buldırırğa teli dide.
Yasterjembski äytüençä, Rusiä Berlek belän anıñ qalğan barlıq partnerların bergä alğanda da küpkä kiñräk, tiränräk häm külämleräk mönäsäbättä, şuña kürä Rusiägä maxsus status birergä kiräk.
