Accessibility links

Кайнар хәбәр

Allawi: Saddamnıñ qayber yärdämçeläre kiläse atnada mäxkämä aldına basaçaq


Ğiraqnıñ waqıtlı premier-ministrı İyad Allawi, Saddam Xösäyenneñ qayber yärdämçeläre kiläse atnada mäxkämä aldına basaçaq, dip belderde. Allawi alarnıñ isemen dä, tögäl waqıtnı da äytmäde. Xäzerge waqıtta Saddamnıñ 11 elekke yärdämçese törmädä utıra. Saddamnıñ üzeneñ mäxkämägä qayçan kiläsen dä Allawi äytmäde. Allawi süzlärençä, Ğiraqnıñ iminlek köçläre Äbü Musa Äl-Zarqawinıñ baş yärdämçe Xäsän İbrahim Farhannı ütergän.

Bügen Bagdadqa kilgän Quşma Ştatlarnıñ Berläşkän ştab başlığı, general Richard Myers, koalitsiä köçläre Fällucanı kire alğannan soñ, ğisyançılarnıñ eşe awıraydı, dide. Alar bu izge şähärne nığıtma itep qullana, şunnan häcümnär oyıştıra ide, xäzer alarnıñ andıy mömkinlege yuq, dide ul. Ul arada Fälluca tiräsendä yaña bäreleşlär küzätelä, ğisyançılar şähärgä qabat kerergä tırışa digän xäbärlär bar. Kiçä anda ike amerikan diñgezçese hälaq buldı. Bügen Bagdadnıñ "yäşel zona" dip atalğan bistäsendä intihar höcüm näticäsendä kimendä ber keşe hälaq bulğan, 12-se yaralanğan. Näq şundıy häcüm anda kiçä dä bulğan ide.
XS
SM
MD
LG