Ğiraqnıñ şiği häm körd säyäsi yulbaşçıları ilneñ yaña küçeş çorı Milli Mäclese aldağı ber-niçä kön eçendä parlament başlığın saylıyaçaq häm xökümätne bilgeliäçäk, dip belderde.
Berläşkän Ğiraq İttifağı äğzase Ali al-Dabağ, şiğilär häm kördlär arasındağı qayber mäs'älälärne çişep beteräse bar, dide. Ämma Ğiraq Milli İminlek kiñäşçese, şulay uq İttifaq äğzase Muwafaq al-Rubaie, Azatlıq radiosınıñ Ğiraq redaksiäsenä, taraflar inde kileşügä ireşte, dip söyläp birde:
"Bez barlıq diärlek mäs'älälärdä kileştek, şul sanda premyer-ministr turında da. Ministrlarneñ kübese turında kileştek. Qalğan mäs'älälär dä küpmeder ähämiätkä iä häm bez söyläşülärne däwam itäbez. İrtägä yä berese köngä alar da çişeler dip uylıym. Milli Mäclesneñ berençe sessiäseneñ iñ soñ digändä atna kiç yä comğa däwam itäçägenä ömetlänäbez", dide al-Rubaie.
İttifaqnıñ tağın başqa ber äğzase, İbrahim Bahr al-Ulum, 275 keşelek Milli Mäclesneñ räise wazifasına iñ berençe namzät –prezident sönni ğaräp Ğazi al-Yawar, dide. Anıñ süzlärenä qarağanda kördlär citäkçese Jalal Talabani prezident itep bilgelänäçäk, häm kördlär premyer-ministr urınına İttifaq äğzase, İbrahim Jağfari öçen tawış biräçäk, dip farazlana.
