Accessibility links

Кайнар хәбәр

Qırğızstannıñ elekke prezidentı üzeneñ comğa çualışlarına bäyle buluın kire qağa


Bişkäk. Qırğızstannıñ elekke citäkçese Äskär Aqayev üzeneñ comğa könne başqaladağı xökümät yortına yasalğan höcümgä qatnaşı buluın kire qaqtı. Aqayevnıñ advokatı Maksim Maksimoviç Qırğızstannıñ AKIpress agentlığına, moña elekke prezidentnıñ da, anıñ tuğannarınıñ da bernindi qatnaşı yuq dip belderde. Moña qädär Qırğızstan premyer-ministrınıñ urınbasarı Daniar Usenov, comğa çualışları Aqayev tarafınnan yaqlanğan digän ğäyepläwlärne qabatlağan ide. Qırğızstan xakimiate xäzerge waqıtta, comğa xökümät binasın yawlawçılarnı citäklägän Urmät Barıqtabasovnı ezläwen, anı qanunnarnı bozıp fetnä oyıştıruda ğäyepläwen belderä. Elegräk Barıqtabasovnıñ prezident saylawlarına nämzät bulıp terkälü ğarizası kire qağılğan ide. Ul arada Qırğızstannıñ baş prokurorı Azimbäk Beknazarov bügen, Äskär Aqayev häm anıñ xatını Mäyrämnän soraw alu öçen prokuratura xezmätkärläreneñ kiläse atnada Mäskäwgä baraçağın xäbär itte. Beknazarov, Aqayev advokatı belän bu xaqta inde kileşende, soraw alu Qırğızstannıñ Mäskäwdäge ilçelegendä uzaçaq dide.
XS
SM
MD
LG