Ğiraq häm amerikan köçläre bügen Süriä belän çik buyında "Qorıç Pärdä" dip isemlängän zur xärbi çara başladı. 3 meñ yarımğa yaqın xärbi cälep itelgän älege çaranıñ maqsatı al-Qaida köçlären yuq itü häm suğışçılarnıñ Ğiraqqa çittän kerüen tuqtatu, dip xäbär itelä. Küpçelek sönnilär yäşägän könbatıştağı al-Anbar vilayätendä mondıy zur xärbi çara äle berençe tapqır ütkärelä. Al-Qaidanıñ Ğiraqtağı bülege üzeneñ internet säxifäsendä, ike kön elek Bağdadnıñ könbatışında yalğa çıqqaç urlanğan 15 Ğiraq xärbien üterüe turında yazıp çıqtı. Bu belderüneñ döreslege äle isbatlanmağan. The New York Times gazetında yazılğança, AQŞnıñ Ğiraqtağı eşçänlegen küzätkän Berläşkän Millätlär Oyışması tikşerüçeläre, Waşington Ğiraq xökümätenä 208 million dollarnı kire qaytarırğa tieş, dip beldergän. Elek citäkçese vise-prezident Dick Cheney bulğan Halliburton şirkäte Ğiraq xökümätenä naçar sıyfatta eş eşläp monıñ öçen artıq küp aqça tülätkän.
