Azärbaycan oppozisiäse parlament saylawlarınıñ näticäläre belän riza tügel. Azatlıq berlege yulbaşçılarınıñ berse, İsa Qambar, matbuğat oçraşuında, 125 töbäktä uzğan saylawlarnıñ 100zendä näticälärne ğämäldän çığarırğa çaqırdı. Çärşämbe könne oppozisiä tınıç uram cıyını uzdıraçağın xäbär itte. Yevropada İminlek häm Xezmättäşlek Oyışması, Azärbaycanda saylawlarnı uzdıruda qayber alğa kiteş bulsa da, tawış birü oyışma häm Yevropa Şurasınıñ demokratik taläplärenä turı kilmäde, dip belderde. Qanun bozular arasında – tawışlarnı döres sanamaw häm räsmilärneñ qatnaşuı kebek citeşsezleklär terkälgän. Bügen iğlan itelgän berençe näticälärgä qarağanda, xakimiättäge Yaña Azärbaycan Partiäse parlamenttağı 125 urınnıñ 62sen alğan. Oppozisiädäge Azatlıq blogına – 5 urın eläkkän. Azatlıq berlege tawış birü tanımayaçağın belderde.
