Biregä bügen Yevropa Berlegeneñ yuğarı däräcädäge räsmiläre cıyıldı, köntärtibendä iñ möhim tema – İrannıñ atom programması. Cıyında qatnaşuçılar arasında Berlekneñ prezidentlığın wäkillek itkän Britaniä tışqı eşlär ministrı Jack Straw, berlekneñ tışqı säyäsät başlığı Javier Solana, tışqı eşlär komissionerı Benita Ferrero-Waldner bar ide. Straw, tağın ber tapqır, ägär dä İran üzeneñ atom eşçänlegenä cawaplı qaramasa, mäsälä İminlek Şurasına tapşırıla ala, dip belderde: "Kileşü nigezendä, ägär dä atom qoralın cäyeldermäw kileşüenä kergän äğza il burıçların ütämäsä, anı İminlek Şurası köntärtibenä quyalar. İran xökümäte, anı närsä kötäsen añlıydır, dip ömetlänäm," dide Straw. Yevropa Berlege, Tähran belän yaqın mönäsäbättä torğan Mäskäw, İrannıñ könbatış belän söyläşülär östälenä qaytuına yärdäm iter, dip ışana. Cäyen Rusiä, İrannı İminlek Şurası köntärtibenä quyuğa qarşı tawış birgän ide. İran bügen – mäsäläne İminlek Şurasına tapşıru – kötelmägän näticälärgä kiterergä mömkin dip belderde.
